ഇതാ അവസാനകാലത്ത് മാത്രം ഈ ലോകത്തുമുഴങ്ങുന്ന ഈ രാജ്യത്തിന്‍റെ സുവിശേഷം ഇതാ പ്രസംഗിക്കപ്പെടുന്നു. യേശുക്രിസ്തുവിന്‍റെ ദ്വിതീയാഗമനത്തിന്‍റെയും യുഗാന്ത്യത്തിന്‍റെയും ദൈവത്തിന്‍റെ പ്രതികാരദിനത്തിന്‍റെയും ദൈവരാജ്യസ്ഥാപനത്തിന്‍റെയും പ്രഘോഷണമാണ് ഈ സുവിശേഷം.

Content: താന്‍ പഠിപ്പിച്ചതെല്ലാം അനുസരിക്കാന്‍ സകലജനതകളെയും പഠിപ്പിക്കാന്‍ യേശുക്രിസ്തു തന്‍റെ സ്വര്‍ഗ്ഗാരോഹണത്തിനുമുമ്പ് അപ്പസ്തോലന്‍മാരെ ചുമതലപ്പെടുത്തി (മത്താ. 28:19-20). കഴിഞ്ഞ 2000 വര്‍ഷങ്ങളായി അപ്പസ്തോലന്‍മാരിലൂടെ ലഭിച്ച സുവിശേഷം ഈ ലോകത്ത് സകലജനതകളുടെയും മാനസാന്തരത്തിനായി പ്രസംഗിക്കപ്പെട്ടു. എന്നാല്‍, യേശുക്രിസ്തു ഇപ്രകാരം പ്രവചിച്ചതായി മത്തായി 24:14ല്‍ എഴുതപ്പെട്ടിരിക്കുന്നു.

എല്ലാ ജനതകളുടെയും സാക്ഷ്യത്തിനായി രാജ്യത്തിന്‍റെ ഈ സുവിശേഷം ലോകമെങ്ങും പ്രസംഗിക്കപ്പെടും. അതിനുശേഷം അന്ത്യം ആഗതമാകും (മത്താ. 24 : 14).

അതായത്, ഇവിടെ പരാമര്‍ശിച്ചിരിക്കുന്ന ഈ സുവിശേഷം ലോകമെങ്ങും പ്രസംഗിക്കപ്പെട്ടാല്‍ യുഗാന്ത്യമാകും എന്നാണ് യേശുക്രിസ്തു പ്രസ്താവിച്ചത്. ഇതുവരെ ഒരു സുവിശേഷം പ്രസംഗിക്കപ്പെട്ടു. എന്നാല്‍ യുഗാന്ത്യം സംഭവിച്ചില്ല. അപ്പോള്‍ ഏതാണ് ഈ സുവിശേഷം? ഇത് മത്തായി 24ല്‍ പ്രതിപാദിച്ചിരിക്കുന്ന സുവിശേഷമാണെന്നു വ്യക്തമാണ്. യേശുക്രിസ്തുവിന്‍റെ ദ്വിതീയാഗമനത്തിന്‍റെയും യുഗാന്ത്യത്തിന്‍റെയും ദൈവത്തിന്‍റെ പ്രതികാരദിനത്തിന്‍റെയും ദൈവരാജ്യസ്ഥാപനത്തിന്‍റെയും പ്രഘോഷണമാണ് ഈ സുവിശേഷം. ഏതാണീ രാജ്യം? ശക്തിയോടെ പ്രത്യക്ഷമായ അടയാളങ്ങളോടെ ഇറങ്ങിവരുന്ന ദൈവരാജ്യമാണിത്. യേശുക്രിസ്തു വീണ്ടും വരുന്നത് പാപികളെ ശിക്ഷിക്കാനും, ഭൂമിയെ ശൂന്യമാക്കാനും തന്നെ കാത്തിരിക്കുന്ന നീതിമാന്‍മാരെ രക്ഷിക്കാനുമാണ് (ഹെബ്രാ. 9:28). അവസാനകാലത്തു മാത്രം വെളിപ്പെടുത്താനായി ദൈവം തയ്യാറാക്കിയിരുന്ന ഒരു രക്ഷയുണ്ടെന്നും, യേശുക്രിസ്തുവിന്‍റെ പ്രത്യാഗമനത്തില്‍മാത്രം ദൈവമക്കള്‍ക്ക് ലഭിക്കുന്ന ഒരു പ്രത്യേക കൃപയുണ്ടെന്നും 2000 വര്‍ഷംമുമ്പ് പരിശുദ്ധാത്മാവ് പത്രോസിലൂടെ പ്രഖ്യാപിച്ചു (1 പത്രോ. 1:5,13). അതിനാല്‍ ദൈവമക്കളെ സംബന്ധിച്ചിടത്തോളം വീണ്ടും വരുന്ന ദൈവപുത്രന്‍ നല്‍കുന്നത് നിത്യരക്ഷയുടെ സദ്വാര്‍ത്തയാണ്.

രാജ്യത്തിന്‍റെ ഈ സുവിശേഷം ലോകമെങ്ങും പ്രസംഗിക്കപ്പെടുമെന്നും വചനം വ്യക്തമാക്കുന്നു. തന്‍റെ രണ്ടാം വരവില്‍ തന്നെ സ്വീകരിക്കുന്നവര്‍ക്കെല്ലാം തന്‍റെ നാമത്തില്‍ വിശ്വസിക്കുന്നവര്‍ക്കെല്ലാം ദൈവമക്കളാകാന്‍ ദൈവപുത്രന്‍ കഴിവു നല്‍കുമെന്നാണ് വചനം പ്രവചിച്ചിരിക്കുന്നത് (യോഹ. 1:12). വീണ്ടും വരുന്ന ദൈവപുത്രനില്‍ വിശ്വസിക്കണമെങ്കില്‍ ആരെങ്കിലും പ്രസംഗിക്കുകയും പ്രസംഗിക്കണമെങ്കില്‍ ആരെങ്കിലും ദൈവത്താല്‍ അയയ്ക്കപ്പെടുകയും വേണം. കാരണം, കേള്‍വിയില്‍ നിന്നാണ് വിശ്വാസം ഉണ്ടാവുക (റോമാ 10:14-17). ദൈവമായ കര്‍ത്താവ് തന്‍റെ ദാസരായ പ്രവാചകര്‍ക്കു തന്‍റെ രഹസ്യങ്ങള്‍ വെളിപ്പെടുത്താതെ ഒന്നും ചെയ്യുന്നില്ലെന്ന് ദൈവവചനം പ്രഖ്യാപിക്കുന്നു (ആമോ. 3:7). അപ്പോള്‍ ദൈവം അയയ്ക്കുന്ന ഈ ദൂതന്‍ ഈ രക്ഷയെക്കുറിച്ചു നടത്തുന്ന പ്രഘോഷണം ലോകമെങ്ങും എത്തുന്നതാണ് മത്തായി 24:14 ല്‍ പ്രതിപാദിച്ചിരിക്കുന്ന രാജ്യത്തിന്‍റെ ഈ സുവിശേഷം.

സകലജനതകളുടെയും സാക്ഷ്യത്തിനായി ഈ സുവിശേഷം ലോകമെങ്ങും പ്രസംഗിക്കപ്പെടണമെന്നത് ദൈവനീതിയാണ്. വ്യക്തവും സമയോചിതവുമായ മുന്നറിയിപ്പ് നല്‍കിയതിനുശേഷംമാത്രമേ ദൈവം ലോകത്തെ ശിക്ഷിക്കുകയുള്ളൂ. കാരണം, ദൈവം നീതിമാനാണ്.  അതിനാല്‍ ഈ സുവിശേഷം ദൈവമക്കള്‍ ദൈവത്തിലേയ്ക്കു തിരിച്ചുവരാനുള്ള കാഹളധ്വനിയാണ്.

ഇതാ അവസാനകാലത്ത് മാത്രം ഈ ലോകത്തുമുഴങ്ങുന്ന ഈ രാജ്യത്തിന്‍റെ സുവിശേഷം ഇതാ പ്രസംഗിക്കപ്പെടുന്നു. ദൈവത്തില്‍നിന്ന് വിവേചനാവരം ലഭിക്കുന്നവര്‍ക്ക് ഈ സുവിശേഷം - ഈ പ്രബോധനം - ദൈവത്തില്‍നിന്നോ അതോ മനുഷ്യരില്‍നിന്നോ എന്നു തിരിച്ചറിയാന്‍ സാധിക്കും. ദൈവത്തിന്‍റെ ഇഷ്ടം നിറവേറ്റാന്‍ മനസ്സുണ്ടെന്ന് ദൈവം അംഗീകരിക്കുന്നവര്‍ക്കുമാത്രമേ ഈ വരം ലഭിക്കുകയുള്ളൂ (യോഹ. 7:16-17). ചെവിയുള്ളവന്‍ കേള്‍ക്കുവാനായി ഈ സുവിശേഷം പ്രസംഗിക്കപ്പെടുന്നു.