ജനങ്ങള്‍ ഉത്തമമായ പ്രബോധനത്തില്‍ സഹിഷ്ണുത കാണിക്കാത്ത കാലം വരുന്നു. കേള്‍വിക്ക് ഇമ്പമുള്ളവയില്‍ ആവേശം കൊള്ളുകയാല്‍, അവര്‍ തങ്ങളുടെ അഭിരുചിക്കു ചേര്‍ന്ന പ്രബോധകരെ വിളിച്ചുകൂട്ടും. അവര്‍ സത്യത്തിനുനേരെ ചെവിയടച്ചു കെട്ടുകഥകളിലേക്കു ശ്രദ്ധതിരിക്കും (2 തിമോ : 4 : 3-4).

അവസാനകാലത്ത് ദൈവജനത്തിനിടയിലേയ്ക്കു വരുന്ന വ്യാജപ്രബോധകരെക്കുറിച്ച് പരിശുദ്ധാത്മാവ് നല്‍കിയിരിക്കുന്ന മുന്നറിയിപ്പാണിത്.

അവസാനകാലത്ത് ഈ ലോകം സാത്താന്‍റെ കരവലയത്തിലായിരിക്കുമെന്ന് ദൈവവചനം പ്രഖ്യാപിച്ചിണ്ട് (1യോഹ. 5:19-20). ക്ലേശപൂര്‍ണ്ണമായ ഈ നാളുകളില്‍ സുഖലോലുപതയിലും ആസക്തികളിലും ജീവിതവ്യഗ്രതിയിലും തിന്‍മകളിലും മുഴുകുന്ന മനുഷ്യര്‍ ഈ ഭൂമിയില്‍ നിറയുന്നു. (2 തിമോ. 3:1-5). അവര്‍ ദൈവവചനത്തെ തിരസ്കരിക്കുകയും നിന്ദിക്കുകയും ചെയ്യുന്നവരാകയാല്‍, ദൈവം നന്‍മയെന്നു പറയുന്നതിനെ തിന്‍മയായും, ദൈവം തിന്‍മയെന്നു പറയുന്നതിനെ നന്‍മയായും വിളിക്കും (ഏശ. 5:20-24).  സ്വവര്‍ഗ്ഗവിവാഹം നിയമാനുസൃതമാക്കാന്‍ ലോകത്തിലുയരുന്ന മുറവിളി ഇതിനൊരുദാഹരണമാണ്. തങ്ങളുടെ അഭിരുചിക്കുചേര്‍ന്നതും തങ്ങള്‍ക്കു പ്രീതികരവുമായ പ്രബോധനം മാത്രമേ ഈ ലോകത്തിനു സ്വീകാര്യമാകുകയുള്ളൂ. അവര്‍ ദൈവവചനമാകുന്ന സത്യത്തിനുനേരേ ചെവിയടക്കുന്നു. എന്നാല്‍ സ്വയംമഹത്വവും പരസ്പരമഹത്വവും തേടുന്നതിനാല്‍, വ്യാജപ്രബോധകരും പണ്ഡിതരും ഈ ലോകം കേള്‍ക്കാന്‍ ആഗ്രഹിക്കുന്ന പ്രബോധനം നല്‍കുമെന്നാണ് ദൈവം മുന്നറിയിപ്പു നല്‍കിയിരിക്കുന്നത്.

അവര്‍ പറയുന്നതു ലൗകികമായതിനാല്‍ ലോകം അവരെ ശ്രവിക്കുന്നു, സ്നേഹിക്കുന്നു (1 യോഹ. 4:1-6, യോഹ. 15:18-19). അവര്‍ ഈ ലോകത്തിന് അനുരൂപരാകാന്‍ അദ്ധ്വാനിക്കുന്നതിനാല്‍, ദൈവഹിതമെന്തെന്നും നല്ലതും പ്രീതിജനകവും പരിപൂര്‍ണ്ണവുമായത് എന്തെന്നും വിവേചിച്ചറിയാന്‍ അവര്‍ക്കു സാധിക്കുകയില്ലെന്ന് ദൈവവചനം അസന്നിഗ്ദ്ധമായി പഠിപ്പിക്കുന്നു (റോമാ 12:2). ഈ ലോകത്തിന് ഉത്കൃഷ്ടമെന്നതിനാല്‍, അവര്‍ പറയുന്ന വാക്കുകളും പ്രവൃത്തികളും ദൈവത്തിന് നികൃഷ്ടമാണെന്ന് അവര്‍ മനസ്സിലാക്കുന്നുമില്ല (ലൂക്കാ 16:15). തങ്ങളെത്തന്നെ ലോകത്തിന്‍റെ മിത്രമാക്കിക്കൊണ്ട് അവര്‍ സ്വയം ദൈവത്തിന്‍റെ ശത്രുക്കളായിത്തീര്‍ന്നിരിക്കുന്നു (യാക്കോ. 4:4). കാരണം, യേശുക്രിസ്തുവിനു യോജിക്കാത്ത തത്വചിന്തകളുടെ വക്താക്കളായി അവര്‍ മാറിയിരിക്കുന്നു (കൊളോ. 2:8). അവര്‍ തന്നെയാണ് പരിശുദ്ധാത്മാവ് മുന്നറിയിപ്പു നല്‍കുന്ന, ദൈവവചനം വളച്ചൊടിക്കുന്ന, ദൈവത്തിന്‍റെ ആടുകളെ കടിച്ചുകീറുന്ന ക്രൂരരായ ചെന്നായ്ക്കള്‍ (അപ്പ. 20:28-30, എസെ. 22:27).

യേശുക്രിസ്തുവിനോട് ഐക്യപ്പെട്ട് വിശുദ്ധജീവിതം നയിക്കാന്‍ ആഗ്രഹിക്കുന്നവരെല്ലാം ഈ ലോകത്താല്‍ പീഡിപ്പിക്കപ്പെടുമെന്നും (2 തിമോ. 3:12), ദൈവത്തിന്‍റെ സത്യവചനം സ്വീകരിക്കുന്നവരെയും ദൈവപുത്രനില്‍ വിശ്വസിക്കുന്നവരെയും ഈ ലോകം വെറുക്കുമെന്നും ദൈവം മുന്നറിയിപ്പു നല്‍കിയിട്ടുണ്ട് (യോഹ. 17:14, ലൂക്കാ 6:22-23). ദൈവപുത്രന്‍റെ യഥാര്‍ത്ഥ ശുശ്രൂഷകര്‍ക്കു ഈ ലോകത്തിലെ മനുഷ്യരെ പ്രീതിപ്പെടുത്തുന്നവരാകാന്‍ കഴിയില്ല (ഗലാ. 1:10). മോശമുതലുള്ള സത്യപ്രവാചകരെ ഈ ലോകം വെറുത്തു. യേശുക്രിസ്തുവിനെ ലോകം വെറുത്തു, പീഡിപ്പിച്ചു,വധിച്ചു. അപ്പസ്തോലന്‍മാരെ ഈ ലോകം വെറുത്തു, പീഡിപ്പിച്ചു, വധിച്ചു.

കാതുകള്‍ക്കിമ്പമുള്ള പ്രബോധനം നല്‍കുന്നവരെ കണ്ടെത്താന്‍ വളരെ എളുപ്പമാണ്. ഇന്ന് ലോകം ആരാധനയോടെ പുറകെപോകുന്ന ക്രിസ്തീയ പ്രബോധകര്‍ ആരെല്ലാമാണെന്ന് പരിശോധിച്ചാല്‍ മതി (1 തെസ. 5:19-21). വിശാലചിന്തകരെന്നും, ആധുനികരെന്നും, സമൂഹത്തിന്‍റെ തുടിപ്പറിയുന്നവരെന്നും, എളിമയുള്ളവരെന്നും, ശ്രേഷ്ഠരെന്നും വിളിച്ച് ജനം പ്രശംസിക്കുന്നതാരെയാണെന്നു തിരിച്ചറിഞ്ഞാല്‍ മതി.

കുഞ്ഞാടിനെപ്പോലെയിരിക്കുകയും, എന്നാല്‍ സര്‍പ്പത്തെപ്പോലെ സംസാരിക്കുകയും ചെയ്യുന്നവരെ വിവേചിച്ചറിയാനുള്ള വരം ദൈവം നമുക്കു നല്‍കട്ടെ!