NIMANNIM ZODDTTI – KALLACHO XEVOTT

Dev Bapan ek nitivont zoddtti ievjilea ani tache vixim Devachea Utrantlean amkam xittkavnnim diea. Zannam zaiat, zoddttecho vhell ailo. Jedna gonv koddeant ghaltole ani pol ujeant lastole te dis laguim pavleat! Mon’xache korne pormonnem tachi zoddtti korcho vhell pois na!  

Nitivont monnsubidar, Mon’xacho Put portun kuddin ailo. Urlam tem tache mhoimevont disnnem (Glorious Manifestation). Yesu Krist (Emmanuel) Devachea nitivontank inam diunk ani Devak virodh kela tea patkeank khast launk distti poddchoch asa (Prokasovnni. 22/12-13, Is. 40/9-10). Jedna adneacho ulo aikunk ietolo ani maha-devdhutancho ulo ani Devache turturecho avaz gaztolo, tedna donui meleant tim ani jivim asat tim, tannim tanche kuddi vorvim kel’lea sogllea korneam pasot, inam diunche khatir, tankam Devachea xinvasona mhukar haddttoleat (1 These. 4/16, Mt. 25/31-34, 41, Upodexok. 12/13-14, 1 Pedru. 4/5).

Sasnnak emkond bhogunk Yesu Kristachea davean ube ravunk zankam doxi kortole, te konn zaun asat? Te zaun asat, zankam parishudh pustokar boroun dovorlolea Devachea Utranchi loz disli (Lk. 9:26) ani him Devachim Utram aplea jivitan pallunk nant (Mt. 7:21-23), ani zannim Yesu Kristachea mannkulea bhava-bhoinnank aplo adar diunk na. Him mannkulim bhav-bhoinnam tachea dakttulea hinddachi vangddi zaun asat, zankam Yesu Krista bhaxen zanvche khatir survatekuch vinchun kaddleant, ani jim Yesu Krist porot kudd gheun Emmanuel hea nanvan ieta mhunn tacher bhavart dovortat ani jim tachea kuttumbachim vangddi zaun asat (Mt. 25:44-45). Yesu Kristan apleak hea sonvsarachea gorib mon’xam borobor sor korunk na, bogor applea bhava –bhoinnam borobor, zannim Deva Bapa thaun zolm ghetla (Heb. 2:11) ani jim tachim Utram palltat (Mt. 12:49-50) ani jim tachim vangddi-herderi zaun asat (Rom. 8/15-17).

Jezu Krist (Emmanuel) Konnak aplea uzvean dovorta? Tim nhoi jim hea sonvsarachea nemam pormonnem borem jivit jieleant tim. Bogor tankam, zankam Devachea Utrachem gorv dislem, ani tem tannim pall’llem ani Yesu Kristachea kuttumbachea mannkulea vangddeank adar kelo (Mt. 25:40).

Dev Bap sodanch borem tem vaitta thaun doxi korta. Hem doxi vo vegllem korop Devan orombakuch suru kel'lem, jedna uzvadd kalloka thaun vegllo kelo. Emmanuel, nimmane zoddttentlean korta tea nimannea doxikoronneantlean, Devan orombak suru kel’lem doxikoronn sompaddnnek paulam.

Yesu Kristachim (Emmanuelachim) bhav – bhoinnam zankam raj favo kelam, tim-ui xinvasonacher bostolim ani lokanchi nit kortolim (Lk. 12:32, Lk. 22:29-30). Xirap poddlolea anj-boddveanchi porian tim nit kortolim (2 Cor. 6:2-3). Khorem mhollear Devan rochlolea rochnnacher doniponn cholounk, ani parishudh’taien ani nitin sonvsaracher raj korunk, ani promannikponnan nit korunk, Devan aplea bhurgeank rochleant (Zannvai. 9:2-3).

Dev nitivont ani tachem nitivontponn sotachem ani nitichem mhunn sogllo sonvsar zanna zatolo ani uchartolo. Devachea bhurgeank soitanan fottoilim ani jem tankam Devan dil’lem tem tannem chorun velem, tea soitanacho aplea bhurgeanim nas korcho, hi Devachi nit (Utpoti. 1:26-28, Sir. 17:3-4, Zannvai. 2:23). Denvcharank Devachea bhurgeanchea paieam pondak haddun tanchem nison’tton korop, hem Devachem nitivontponn (Rom. 16:20). Rochnnanim Devachea burgeam pasot zuzop ani nitivont mon’xank jevonn diunche khatir, rochnnanim aple sobhav soddun divop, hem Devachem nitivontponn (Zannvai. 16:17, 16:23). Rochnnanim Deva vangdda mellun vaittoveancho nas korop, hem Devachem nitivontponn. Dev Bap zaka vaittovea mon’xanim adim vollkunk nakarlo, toch zaun asa khoro Dev, hem vaittovea mon’xanim polloun mandun gheunchem, hem Devachem nitivontponn (Zannvai. 12/26-27, Sir. 34/4-6). Devachea bhurgeank piddapidd dilea tankam khast lavop hem Devachem nitivontponn (1 Thes. 1/6-7).

Polleiat, kallacho xevott laguim pavla! Jea disa sonvsar ujean lastolo ani mollob goddgoddan nanch zatolem, to Devacho dis laguim asa! (2 Pedru. 3:10-12). Yesu Kristachea dusrea ienneacheo khunna ghoddun aileo. Kallachea xevottacheo khunna tumchea dollea mukhar ghoddttat. Ami jim hem sogllem polletat tannim Yesu Krist (Emmanuel) dharachea umbrear aila mhunn somzun gheunk zai (Mt. 24/32-35).

Devachea Sobda vorvim jem sogllem ghoddun haddlam ani dovorlam, To Devacho Sobd fatti kaddlea uprant, sogllea rochlolea vostuncho nas zatolo (2 Pedru. 3:5-7, Heb. 12:25-27). He bhaxen Devacho Sobd zo rochnnar zaun asa, toch zata nas korpi (Oromb ani xevot -Prokasovnni. 21:6). Devacho sorvxoktivont sobd, ek darunn zuzari koso, To denvun ailo, eke pazlole tolvari bhaxen, bodlunk zaina tosli adnia gheun To ubo ravlo ani soglli prithum tannem mornnan bhorli (Zannvai. 18:14-16). Polleiat, Dev prithumer aslolem sogllem zaddun uddoita te dis laguim pavleat (Zeph. 1:2-5). Devachea   Utrant boroun dovorlolem asa ki ho atancho sorg ani sonvsar zo patkachea adhin asa to nanch zatolo (Mt. 5:18).

Devachea mhoimevont ani bhirankul disa,suriacho kallok zatolo ani sorgachi xokti haltoli, jim konnak Deva bapan Sion porvotar ekttaileant ani samball’leant,  tim tem sonstolim ani tacher zoit vhortolim(Joel 2:31-32). Prithum ani sorg hal'learui Dev tancho rakhondar ani asro zatolo (Joel 3:16). Dekhun Dev aplea sogllea bhurgeank formonn poddche adim jivit bodlun tache xim portun ieunk apoita (Zeph. 2:1-3).

Polleiat, Yesu Krist (Emmanuel) sogllea pordhanancho, podviancho, ani odhikarancho bosm korta ani raj Bapachea adhin korta (1 Cor. 15/24). To Krist-virodheacho ani tachea sogllea dusmanancho ani sogllea vaittachea karonnacho nas kortolo ani nimanno dusman mhonnge, mornnancho bosm kortolo ani aplea mogacheank sorgache temxer ani nove prithumer vhortolo (1Thes.4:17, Jn.14:1-3).