SODDVONN AZUN PURNN ZAUNCHI ASA – 1

Kitlo nirbhagi monis hanv! Mhaka mornnache vatten oddun vhorta tea mon’xa soimbantlo konn mhaka nivarunk xokot? Ani fokot rochnna nhoi: bogor ami-i amchech bhitor pirgon asanv, kiteak Devan Aplo Atmo prothom' foll mhonn amkam dila, ani dekhun To amkam sopurnnaien Aplim bhurgim kortolo, mhonnge amchea kuddink sutka ditolo tea disachi vatt ami polleun asanv. ( Rom.7:24;8:23 )

Punn amcho khaxa des sorgar asa; ani sorgar thaunnuch amchea Soddvonnarak, Somia Yesu Kristak, ami axeun ravtanv. (Phil.3:20)

Toxench somestanchi patkam kaddun uddounk Kristan ekech pavtti Apnnakuch somorpun  dilo; dusre pavtti To dixtti poddtolo, patok kaddunk nhoi, punn Tachi vatt polleun astoleank taronn diunk.(Heb. 9:28 )

To he amche holke kuddichem rupantor korun ti Aple mhoimevont kuddi sarki kortolo, soglleo vostu Apnnache adhin To korunk xokta tech podven To hem rupantor kortolo. ( Phil. 3:21 )

VOLLOKH

Hea lekacho hetu zaun asa ek kollounnim soddvonneche ievzonne vixim,  ji Dev hea xevottachea kallani, zannim he xevottache kall mhonn mandun ghetleat ani Yesu Kristachea Mhoimevont ienneacho vell laguim pavla mhonn mandtat tanche khatir chalik laita(1). Ekuch khoro Dev asa, Tacho Put Yesu Krist ekloch Soddvonnar ani Devachem Utor sot mhunn mandun ghetat tankam hi sotam ugtim keleant.

Ami choddxem hanga tin vattarani polletanv ani tancher fokot  boroun dovorlolea  Devachea utranchea adharacher bhasabhas kortanv.

Poilem, Devan mon’xa khatir sasnnik soddvonn toiar kelea. Yesu Kristan aplea poilea ienneant sompurnnaien soddvonn dilea Kai?  Soddvonnechi sompurnnai mhollear kitem? Hi To kedna ditolo?

Dusrem mhollear Dev sodanch mon’xam vorvim vavorta ani hi soddvonn poili ugddapi  kori nastana ani tache khatir lokank toiar korinastana, diunk zaina ani Devan dhaddlea bogor konnunch ti porgott korunk xokona.  Hi soddvonn nemlolea vellar porgott korunk zai. Xevottachea kallar Dev toxem kortolo mhonn boroun dovorlolem bhakit asa (1 Ped. 1: 5). Atam, proxnn uprastat te he: Hi soddvonn konn ugddapi kortolo vo porgott’tolo? Tichi porgottnni khuim zatoli?

Tisrem, Devacho put xevottachea kallar soddvonn ani khast donuim diunk ieta mhonttoch,  konnank hea sonvsarant hi soddvonn melltoli kai? Hi soddvonn tankam khuim melltoli kai?

1. SALVAR ZAL’LO  LOK

Kristi bhavarth eka Soddvonnaracher ani To dita te soddvonnnecher attaplolo  asa. Yesu Krist ekloch Soddvonnar ani tachea umalleantlean, rogot vharovop, Khursar moron ani punorjivontponnam vorvim ami salvar zaleanv mhunn  mandun ghetat ti zaun asat Kristanvam. He soddvonnecho onbhov zaun asa zo eka Kristi mon’xachea  jjvitak akaar dita. Dekhun fatlea 2000 vorsam Kristi Lokanim Soddvonnechem voddponn sangun tea vixim porgott kelam.

Ami Parishudh pustokantlean zaite utare (passages) vachleat je amkam kollit kortat ki Kristan amkam  salvar keleant. Udharonn, Devachem Utor oxem xikoita: karonn Devachech doiallaien, bhavartha udexim, tumkam soddvonn mell'llea, tumich kel'lea proitnancho foll nhoi, punn Devachem funkeachem dennem (Efez. 2:8). Oxe, Parishudh pustokant her zaite utare (passages) asat je amkam sakx ditat ki ami adhinch salvar zaleanv mhunn. (udharonn Rom. 10:10, 1 Kor. 1:21, Efez. 2:5)

Zaite pavtti lok hea eka utareacho (passage) upeog korun sangtat: Ani Tannem tankam sanglem, “Ak’khea sonvsarant vochat, soglle rochnnek Xubhvortoman porgottat. Bhavarth dhortit ani Povitr-Snan ghetit tim soddvonn zoddtolim; punn bhavarth dhorina zatit tim khastichem formonn ghetolim. Bhavarth dhortoleam sovem heo khunna dixtti poddtoleo. Mhojea navan denvchar kaddtolim, noveo bhaso ulloitolim, sorop dhortolim ani jiv kaddpachem kitem-i tim pietit bi, tankam tem vaitt zaunchem na, piddevontancher hat dovrun tim tankam borim kortolim (Mk. 16:15-16).

Punn, je lok apunn salvar zaleat mhunn dhavo kortat, tanchea khonnaim bhitor hea Devachea utran volleri kel’lea kunnancho aspav na mhollear tem zaun asa ek nirvivadit sot. Punn hem Devachem Utor sot zaun asa ani hem purnn zatolem. Tor ek vost  spoxtt zaun asa: hea utarean sanglea ti bori khobor atam mhonnosor azun porian porgott korunk na. Hanga ul’lekh kela to bhavarth azun porian ieunk na (karonn  bhavarth aikun ieta). Ho utaro (passage) sakx dita ki soddvonn azun porian  konnakuch mellonk na.

Ami dusrem ek Devachem Utor topasum-ia. To diuncho asa tea sasnnik jivita vixim, Yesu Kristan mhollem: Khorench khorem hanv tumkam sangtam, jim konn bhavarth tthevtat, tankam sasnnik jivit mellta. Hanv jivitacho Unddo. Tumchea purvozamnim oronneant man'na khelo ani tim morun gelim. Punn ho sorgar thaun denvlolo Unddo, to khatit tim morchim nant. Hanv sorgar thaun denvlolo jivo Unddo; ho Unddo khatat tim sasnnak jivim astolim; ani sonvsarak jivit mellche khatir Hanv ditolom to Unddo mhojench mas (Ju.6:47-51).Yesu Krist, zannem amkam Mon’xacho Put  dita tea sasnnik jivitachea Unddea khatir vaurunk  sanglam (Ju. 6:27), tannem spoxttponim kollit kelam ki zo konn ho jivitacho Unddo khatit to morchona, bogor, sasnnak jietolo.Duens-a vorvim, vo zantteponnache poristitin, vo ghatki apghatantlean monis morunk xokta. Punn eka mon’xak sasnnak morunk naka zalear, tachi kudd sasnnak duens, zantteponn ani mornna (eka utran kusounnim) meklli zaunk zai. Yesu Kristan sanglam ki To dita to Unddo ami khatit zalear, hem ghoddtollem. Hem tem bhasailolem sasnnik jivit vo soddvonn (1Ju.2:25).

Punn, sogllim zannim bhavarth dhorlo, sogllim jim tannem dil'lo to Unddo khelo, tanchean ata porian kusounnecher zoit vorunk zaunk na. Sogllo lok melo, konnakuch azun porian sasnnik jivit mellunk na. (Heb.11:39-40). Yesu Krist sot tench uloita, ani tachean takach nakarunk zaina dhekun, tachem Utor purnn zaunk  zai. Teach khatir, hem spoxtt zata ki sasnnik jivit (soddvonn) jem  Ju. 6:47-51 hatunt bhasailam tem azun porian konnakuch mellunk na. Toxem zalear, salvar zaleant tankam mell’llea ti soddvonn kitem tor? Dusrea utranim, Yesu Kristan tachea Poilea Ienneant dilea ti soddvonn kitem tor?

2. YESU KRISTAN DILEA TI SODDVONN

Yesu Kristacher bhavarth dhortat tankam  mell’llea ti soddvonn kosli kai?  Pentecosta uprant xis Pedru tachea poilea bhaxonnan hem spoxtt korta (Ith.2:37-38). Yesu Kristan amchim patkam Apnnacher ghetlim, ani aplea koxttantlean, rogot vharoun ani khursar morun tanchem farikponn dilem.  Lok zor xubhvortoman aikun aplem jivit bodoltit, Yesu Kristacher bhavarth dhortit ani tachea Nanvan bautizm ghetit, zalear tankam  tanchea patkanchem bhogsonnem ani Parishudh Atmeache dennem melltolem. Hi zaun asa  ti soddvonn ji Yesu Kristan  aplea Poilea Ienneant amkam dili.  

Soddvonnara vixim boroil’lim bhakitam Yesu Krista thaim purnn zalim mhunn lokan sot mandlem. Teach khatir, Yesu Kristak tannim aplo ek Somi ani Soddvonnar koso svikar kelo. Soglleank zannim sot mandlem tankam patkanchea bhogsonneanchi kurpa mell’li. Borem, hi zaun asa ti soddvonn ji tankam mell’li – patkanchem  bhogsonnem. Tanchim patkam bhogsolim tea khore khobren tanchim Kallzam khuxeallkaien ani xantin bhorlim. Devan Parishudh Atmeache xokten tanchea kallzantleo soglleo vaitt xokti  kaddun uddoileo (Mt.12:28). He bhaxen Devachem Raj  tanchea kallzanim suru zalem. Hem zaun asa Devachem Raj jem eka bhavarthiachea kallzan sthapit zalam (Hem zaun asa poilem Devachem Raj jem Yesu Kristan amkam xikoilam). Hich nhoi ti kurpa ani onbhov hea Devachea Rajeacho, Yesu Kristacher bhavarth dhorla tankam  atam porian hea prithumer mell’la to?

Ek bhavarthi zor hi kurpa sandinastana ani Devachea Utrak sakx zaun jieta, zalear khorench to hea  Devachea Rajeachea onbhovan mortolo. Jedna ek monis oso morta tedna, thoim Devachea  Rajeacho vorto vattar asa, zoim to veta ani bhitor sorta (khorench, punn nhoi kuddin). Taka ami voikhuntt mhunnttanv, tem zaun asa Devachem dusrem  Raj jea vixim Yesu Kristan porgottlam.(Mk. 9:47-48) Hench tem Devachem Raj jem Yesu Kristacher bhavarth dhovorun atam porian Devboktin meleant tankam mell’llam tem.