PENTECOSTACHEA DISA XISANCHER KONNEM HAT DOVORLE?

Yesu Kristan khud aplea xisank Parishudh Atmo diunk na. Deva sovem ani ek ievzonn asli.

Devachem utor sakx dita ki Yesu Krist 30 vorsanche piraier astana Parishudh Atmean bhorlo. Zorui tannem apostolank aplea borobor vele ani uprant 3 vorsam tankam xikoile ani zorui zaitim dennim ani odhikar tannem xisank dile, torui tannem tankam Parishudh Atmo diunk na. Punn tannem bhasaile ki tamkam ek xaroti-Parishudh Atmo ditolo mhunn.

Xastrancho orth somzunk tachea punorjivontponnam uprantuch Yesu Kristan aplea xisanchim monam ugoddlim(Lk. 24 : 45 ). Punn tedna legun tannem tankam Parishudh Atmo diunk na. Zorui tannem Pedruk aplea menddrancho samball korpachi zababdari dili, torui Parishudh Atmean bhorunk xisanchea mathear tannem hat dovrunk na.

Xisank Parishudh Atmo diunk Devachea putak tank nasli Kai? Na, sorgar ani sounsarant sogllo odhikar apleak dila mhonn tannem jahir kelam. Aplea xisank Parishudh Atmo mell’llolo taka naka aslem Kai? Na, xis Parishudh Atmeache xokten bhorche mhonn ti tachich kuxi zaun asli. Tache xis Parishudh Atmean bhorunk to tanchea khatir magnnem kortit ani Dev Bap tachem aikuncho naslo mhonn konnacheanui mhonnunk zait? Na, Deva ani mon'xam modem toch ekloch modesti zaun asa ani Dev Bap sodanch tachem magnnem aikota mhonn tannench sakx dilea. (Ju.11:41)

Parishudh Atmo eka mon’xa bhitor ieunk zai tor, toddim condisanvam (conditions) purtim zaunk zai. Tatuntlem ek chodd gorjechem mhollear, jea mon’xa thaim Parishudh Atmo asa tannem Parishudh Atmo gheuncho asa tea mon’xacher aplo hat dovorunk zai. Hat dovorlea bogor Parishudh Atmo diunk zaina mhonn Devachem utor sakx dita. Punn xisank Parishudh Atmo diunk Yesu Kristan tancher aple hat dovorleat mhonn ami xubhvortomanant khuimsorui polleunk na.

Yesu Kristan tachea xisancher aple hat dovorun kiteak tankam Parishudh Atmo diunk na?

Yesu Krist sorgar choddun 10 disa uprant ekxem vis (120) xis Parishudh Atmean bhorle. Yesu Krista udexim Devan Parishudh Atmeak sounvsarant pattoilo tem zaun asa sot. (Tit. 3:6) Punn tea vellar to Bapachea uzveak aslo.

Markuchea ghorant voile kuddint zomun aslolea Yesu Kristachea xisank Parishudh Atmo mellunk konnem tancher hat dovorle kai? Xisank Parishudh Atmo mellche adim Markuchea ghorant ekttouloleam modlo konn zait to zo Parishudh Atmean bhorlolo aslo?

Sirak 39:16–17 ‘Kitlim ojapvont Sorvpodvedarachim kortutvam! To tharaita teach vellar soglleo vostu ghoddun ietat.’ ‘Hem kitem ani oxem kiteak ghoddta’ tem vicharinaka. Protek prosnak favo teach vellar zobab melltolo……….

Devachea mon’xank he bhaxen Parishudh Atmo diunk Devan kiteak tharailem kai?

Polleiat, Devik ghutt ugddape zatat toslo vell ailo!