PARISHUDH MAI KHOTAVINN ZAUN ASA.  TI DEVA THAUN ZOLMOLEA

Devacho Put zo Devacho sobd zaun asa (Ju. 1:1-5 ) to Parishudh  Maiechea kusveant  tache kuddin nhoi bogor sobd koso ailo. Tednam Taka Dev Bapachem kuddint ani rogtant bhagidarponn naslem. Bim khud sobd zaun aslo(Lk.1:28 ). Devachea sobdan khudd ghetli ani mas zalo mhonn Devachem Utor ugteponnim porgott korta. (Ju.1:14, Heb. 2:14) Dev Bapan Gabriela vorvim uloilolo sobd(Lk1:28) Parishudh Maiechea kusveant rig ghetolo tem  tichea  bhavarta udexim ghoddlem. Devachea Putan Parishudh Maiechea kusveant masan ani kuddin akar ghetlo.  Oxem Parishudh Maiechea bhavartan melloun ghetlolea rogta vorvim Dev Bapan amchea patkachem bhogsonnem amkam favo kelem. (Rom. 3:26)

Devachea Putak – sobdak - Parishudh Maiechea kuddint ani rogtant bhagidarponn melltoch, taka Dev Bapachea Kuddint ani rogtant bhagidarponn mell’lem. (Heb. 2:14). Tor Devachea bhurgeank hem bhagidarponn Adanvam udexim mell'lem.    (Itihas. 17:26) Punn Adanvachea patkak lagun tache soglle sonstichi kudd ani rogot oxudh’ zalem ani mornachim gulam zali. Punn Yesu Kristak parishudh kudd aspak zai asli dekhun Tannem Parishudh kuddint ani rogtant - Parishudh Maiechea kuddint ani rogtant bhag ghetlo.

Yesu Kristache kuddi ani rogtache bhettovnnentlean ami amchea patkantlim salvar zaleanv. (1Ju.1:8, Iz. 53:4-5)

Yesu Kristan sorginchi vatt porddeantlean(through veil) uggodli ji zaun asa Tachi kudd. (Heb.10:19-20) Yesu Kristachi kudd ani rogot Parishudh nasli zalear, amkam Yesu Kristachea kuddint ani rogtant bhagirdarponn naslem zalear, konnuch ami amchea patkantlim salvar zaunchim naslim. Karonn khuinchi-i kudd ani rogot jem mornachea ani patkachea kaidea khala asa, tachean monx’anchea patkank farikponn diunk zaina. Bhettovneo Devachea asnea mukhar khot nasloleo asunk zai. Parishudh Mai zor Adanvache sonstichi asli zalear tichi kudd ani rogot oxudh’ ani mornachea kaidea khala astoli asli. Kiteak Devachem utor sakx dita ki eka mon’xa udexim (Adanv) patok ani moron sonvsarant bhitor sorlem, ani oxem sogllea mon’xank moron pavlem, kiteak soglleamnim patok kelem. (Rom.5:12, 17).

Sogllea Devachea bhurgeank Adanvam thaim rochleant. (Ith.17:26) Adanvachea patkak lagon sogllim mon’xam avoichea kusveant zolmoche adim thaun patkim zaun asat (Stotr. 51:5). Parishudh Mai zor Adanvache sonstichi asli zalear, Yesu Kristachi kudd ani rogot patkachi astoli asli. Punn Yesu Kristak patok naslem ani tannem amchea sarkeponn ghetlem fokot patok soddun.

Khotavinn (Immaculate) mhollear nhoi rogtan, vo kuddiche vondovnnen vo mon’xache khuxen zolm ghevop, punn Deva thaun zolm ghevop. (Juv.1:13) Ho zaun asa unch kulliecho zolm jea babtin Devachem utor sangta (Zan.8:3-4). Parishudh Mai-ek ho unch kulliecho zolm favo zala. Yesu Kristak zolm diunche khatir ani Yesu Kristachea gunnank lagun Devan Parishudh Maiechea babtint ek sovlot (concession) dilea, oxem choddxem sobheche vidvan somzotat. Punn Adanvache sonstiche babtint Dev toxem korunk xokona. Karonn Dev Bapan Adanvam thaun hea prithumecher zolmun ienchim asat tea sogllea applea bhurgeank rochun hadleant. Dev svatak nakarunk xokona.

Adanvank matientlean rochla, mhonnge ami sogllim mon’xam matientlean rochleant. Punn Parishudh Mai prithum ani dhul’liche poile dhatu korche adim Dev Bapa thaun zolmolea. (Mhon.8:22-30) Parishudh Maiecho Atmo zaun asa Zannvaiecho Atmo. Devachem utor Zannvaiechea Atmeachea kherit gunnanchem varnan korta. (Zan.7:23-30). Adanvache sonstichea khoinchea-i mon’xak he vishesh gunn lagu zainant. Bogor he vishesh gunn deivik zaun asta.

Oxem tor, Parishudh Mai khotavinn mhonn ak’kench Parishudh pustok sakx dita!