YESU KRIST BAPA-VIXIM SPOXTTPONNIM XIKOITA

“Tuka, ekleach khorea Devak, ani Zaka Tuvem pattoilai tea Yesu Kristak vollkhun ghevop”, hench tem Sasnnik Jivit. (Ju. 17:3)

Devak konnem kodinch polleunk na; punn Zo Bapachea gopant asa tea ekleach Putan Tachi vollokh dilea. (Ju. 1:18)

Sogllem Mhojea Bapan mhojea hatant ghal'lem asa; ani Put konn to konnuch nokllo bogor Bap; ani Bap konn to konnuch nokllo bogor Put ani zankam Bap dakhoun diunchi Putak khuxi asot tim mon'xam. (Luk 10:22)

Devachea Putan aplea Bapachi vollokh chitram vo fottu-am vorvim nhoi punn Devachea Utrantlean ugddapi kelea. Parishudh Atmo zache thaim thikann korta, to monis Devachem Utor aikota vo vachta tedna, tea mon’xachea kallzant Parishudh Atmo ugddapem korta ani prokaxit korta tem zaun asa Dev Bapachem khorem chitr. Devachem Utor somzunk amkam Zannvai mellunk zai(Mt.13:9, Dan. 12:8-10). Devachem Utor Parishudh Atmeachea preronnan boroilam dekhun, tea Utracho khoro orth amkam somzunk, teach Parishudh Atmean  tem vachun sangunk zai (hea Devachea Utrantlean Dev jem kitem amkam sangunk  ievjita tem) ( Iz. 34:16 ). Amkam Sotacho Otmo mellta tedna ami sotache purnntaiek pavtat. (Ju. 16:13-14). Sot zaun asa Devachem Utor (Ju. 17:17). Devachea Bhurgeank Devachea Utrachea purnntaiek pavoilea uprantuch tim Devak purnntaien vollkhotolim. Hem fokot  kallachea xevottak goddttolem.

Ozun zaiteo vostu hanvem tumkam sangcheo asat, punn teo tumchean atam monant gheunk zainant. Deva sombondim sot ugddapem korta to Atmo ietolo tedna, To tumkam purnn sotachea vatten choloitolo, kiteak To Aplea podorchem ulouncho na, punn jem kitem To aikota tem To sangtolo, ani ghoddchem asa tem sogllem tumkam kolloitolo (Ju. 16:12-13).

Devacho Put hea prithumer mhoimevont zata tedna Dev amkam Sotacho Atmo dita. Devacho Put tachea Poilea Ienneant mhoimevont zaunk na, bogor tannem Dev Bapak mhoimevont kelo. Putak fokot Tachem Dusrea Ienneant mhoimevont kortole.

“Hem sogllem Hanvem tumkam voparimnim sanglam; punn oslo vell pavot ailo, ki Hanv ani tumche kodde voparimnim ulouncho na, punn Bapa vixim ugddapim uloitolom.” (Ju. 16:25 )

Tachea Poilea Ienneant Yesu Krist aplea Bapa vixim fokot voparimnim uloilo. Punn to hea prithumer portun ieta tedna aplea Bapa vixim ugddapim uloitolo mhunn tannem kollit kelam.

Annik-ui ami zannonv: Devacho Put ailo ani Khorea Devak vollkhunk Tannem amkam vivek dila. Hea Deva sovem ani Tachea Puta Yesu Krista sovem ami asanv. Hoch to khoro Dev ani Sasnnik Jivit. (1 Ju. 5:20)

Oxem tor, atam ami Dev Bapak spoxttponnim ani sotan vollkhunk xoktat toch zaun asa ek vhoddlo puravo, zo Devacho Put portun kuddin hea prithumer ailo mhunn govaiki dita.

Zannvaiecho oromb mhollear Sorvpodvedarachi bhirant, ani bhagivontanchi zannvai mhollear somjikai. (Mhonn’nneo 9:10)

Dev Bapak ek Nanv asa ani fokot Yesu Kristachean hem bhov Parishudh Nanv aplea bhavam bhoinnank  porgott korunk zata. (Iz. 52:6, Heb. 2:12). Atam ami Devachea utrantlean Dev Bapachem nanv zananv! Tacho vavr kitem to-ui amkam atam kollun aila. Polleiat ami atam  Sotachea purnntaiek pavtat.

Ami zananv ki Devacho Put ailo, ani Dev Bapak zo zaun asa Sot, Taka vollkounchem  ginean tannem amkam dilam!