CANA GAVANT PARISHUDH ANKVAR MAIECHI BHUMIKA

Devachea hor eka kamak tachea xim-mer naslole zannvai-en tharailolo ek nemlolo vell asa. Tachim kamam hea nemlolea vella adim vo uprant ghoddunk zainant. (Upodexok 3:1, Sir.35:15-17) Devan dil’lim kamam nemlolea vella adim korunk mon’xak fuslaita to zaun asa soitan.

Yesu Kristan aplem jivit Bapachim kamam korunk sarlem. Punn Putan hea prithumer korchea hor eka kamank, Bapan ek vell tharailolo asa. Yesu Krist jedna to bara vorsamche pirai-echo also tedna Devachim kamam purnn korunk to Dev mondirant fattim ravlo mhonn tannem kollit kelem. Punn tache Avoichi adnia pallun to portun ghara gelo. Tea uprant fuddlea 18 vorsam pasun Dev Bapachim Utram lokak diunk ani Devachea Rajeachim kamam korunk - aple ghorantlo bhair soron Bapachea kamant vavurlolo taka ami polleunk na.  Dusrea disa, vo fuddlea mhoinneant vo fuddlea vorsant Devachea kamant vavrunk To kiteak bhair sorunk na?

Tacho bautism ani challis disupas ani magnnem korun zalea uprant pasun, Cana ganvchea logna somoiar tannem sanglem tacho vell ieunk na. Dusrea uttranim, kitem-i sangunk vo korunk tannem nakarlem. Torui astana, logn familichea ghorant soro na mhunn Parishudh Maien taka kiteak sanglem? Tedna porian Yesu Kristan koslich milagr korunk nasli. Zalear Parishudh Maien ticho Put kitem sangta titlem-i korat mhunn hazir asloleank tinnem kiteak sanglem?

Tichea Putacho vell ieunk na torui Ti tache mukhar ek modestichi bhumika ghetali kai, zoxe zaite Kristi dhorm xastri xikoitat? Toxem aslem zalear, ti soitanachi korni mhunn somzum ieta, kiteak Devachea Putak tachea vixim boroilam tea pormonnem nemlolea vella adim kama purnn korunk   bhuloita to zaun asa soitan. Bapan nemlolea vella adim Put kainch korchona ani tachean kitench korunk-ui zaina. Challis disacho upas somptanch fatrache undde korunk ani Devmondirachea kollsar thaun sokla uddki marunk Yesu Kristak tallnent galpi toch soitan zaun asa. Yesu Krist Raza zaunk zolmol’lo torui, tachea Poilea Ieneant Bapan taka dil’lem te missanv vo karya zaun asle Devache porjechea patkanchea farikponna khatir khursar morunk. Tor jedna, porza nemlolea vella adim forsan taka Raza korunk sodtali, (Dusrea ienneant to Razancho Raza zaunk ieta) tednam to apunnuch thoimsorlo koddsorun dongrar gelo (Ju. 6: 14-15)

Punn aplea ekleach malgoddea Putak, zaka iuga-kalla pasun porza ravtali taka soitanachea adin aslole eke veokti vorvim (Parishudh Ankvar Mai) hea pritumer dhaddunk Dev Bap murkh vo podvi naslolo nhoi. Punn Sasnnik Utor favo zal’le Parishudh Mai-en ankvarponn ogddainastana, aplea bhavarta vorvim taka zolm dilo. Hi veokti soitanachi khuxi korpi kodinch zaunk xokona.  Tache poros, bara vorsamche piraer Bapache kam korunk diunk na tedna, Putan aple avoichi adnia pall’lli tem ami adim pollelam. Soitanachi adnia pallunk to oskot naslo. Bogor jem kitem tannem sanglam ani kela tem aplea Bapache adnia pormonnem kela mhunn tannem kollit kelem. (Ju.12 :49-50)

Cana lognant kitench korunk survatek nakarlea uprant jedna tache Avoin thoimsor ekttoul’lea lokak to sangta toxem korat mhunn sanglem, tedna kiteak Yesu Kristan Devachea Rajeachi tachi poili korni keli? Tacho vell zo tedna passun ieunk naslo, zalear to vell rokddoch dusre minutak vo goddiek koso ailo? kitem ghoddlem thoimsor, jea vorvim Yesu Kristak udkacho soro korunk sfurti mell’lli ani hi korni Devachea nemlolea vellar zallea mhunn tem koxem sidh’dh zata?