BHAVARTH ANI SION 

Sion zaun asa hindd zo Deva Bapan sonvsar rochun ieunchê adim vinchun kaddlolo. (Rom 8:30). Devachea Putachea sarkeacho zaunk nirmil'lo hindd  (Efez 1:4, Rom 8:29), Sion Devachea sogllea boroilolea Utrak Amen mhonnta.

Sion AIZ hea Kallant (iugant) jieta (Heb 3:13). Kallachea khunna velean (Mt 24:32-34) amkam he nimanne dis mhunn kollon ieta. Sionak Deva Bapan Kan dileat. Devachea Rajeachi Bori Khobor Kan asloleank ditat (Mk 4:9, Luk 8:8, Prok 2:7, Prok 3:6, Prok 13:9) Deivik Zannvai zaun asa ho Kan.Ho Kan sonvsarachea avazantlean Devacho Tallo vollkhun gheunchem dennem dita.Sionak Devacho Tallo vollkhun gheunchi tank ani Tachea Talleacher visvas dovrunk novea kallzachem dennem favo zala  (Ez 36:26), taka Emmanuelan sobhentlean bhair kaddla, zhoim kaido soglleant chodd raj korta (Ju 10:4).Deva Bapan nitivont kel'lea sogllea porzapotimnim(Patriarchs) poripurnntai melloun gheunche adim, hea hinddak poripurnn zaunk apoila (Heb 11:39-40). Atam Sion hindd Dev onubhovachea oronneant pavla. Mhonnlear, Sion atam Dusrea Suttkechea Provasant asa. Her sogllea lokam poros chodd sobit daiz mellpachi bhasavnni dil'lea Sionak heram poros vhoddlo bhavarth asa (Jer 3:19).

Sionacho Bhavarth kitem?

Jezu Krist, Devacho Put ani Ekloch Soddvonnar, portun he pritumer mon’xa-soimbant aila, oxem Sion sotmandta ani hi Bori Khobor porgotta (1 Ju 4:2, Jer 14:8-9). Tachem nanv Emmanuel (Iz 7:14) ani To sonvsarachi mon’subi kortolo ani Devachi Nit purnn kortolo (Iz 42:2-4). Fokot jea monxam thaim Deva Bapacho Atmo asa, to Jezu Krist  kudd gheun portun aila oxem sangunk xokta (1 Ju 4:2). Jezu Krist 2000 vorsam adim hea sonvasarant ailolo tedna To kudd gheun ieunk naslo punn to Devachea Utracho Atmo zaun ailolo (Luk 1:28). Parishudh Maiechea bhavartha vorvim, Tannem Tichea kusveant kudd ghetli (Ju 1:14, Rom 3:26). Punn To dusre pautt atam kudd gheun portun aila (1 Ju 4:2). Devachea sogllea bhurgeank ekttaim haddun Tannem Apli Uzvaddachi Sobha sthapon kelea oxem Sion sotmandta (1 Tes. 5/5), jim zaun asat Uzvaddachim bhurgim Taka Deva Bapan sonvsar rochon ieunchê adim dil'lim tim(Eph. 1/4; Ju. 6/39), jim Tachea Atmea vorvim (Zek 10:8-10, Ez 36:24-27) Tachim bhav-bhoinnam (Heb 2:11). Emmanuel Sionant Soddvonnar, Devachea Rajeacho Raiancho Rai (Emperor) koso ietolo (svotak ugddapo kortolo) mhunn ho bhavarth Sion sangta (Iz 52:2, Iz 59:20, Heb 9:28). Sion mandun gheta ki Tacher ani Tachea Sasnnik Jivitachea Jivit diupi Utracher (Ju 6:63) visvas dovrun jim meleant tim punnorjivont zatolim ani Sorginchi kudd gheun tim Sionak ietolim (1 Tes 4:16). Sionak urlolim asat tim oprimit mogan, kurpen ani xokten bhortolim ani Tachea sarkeachim zaun rupantor zatolim (1 Tes 4:17, Filip 3:20-21, 1 Kor 15:52). Dev Bap Aplea bhurgeank bhet korunk ietolo ho zaun asa Sion kuttumbacho visvas (Am 4:12, 1 Ju 3:2). Sion hindd Deva Bap Aplea bhurgeank bhett diunk ieta tedna zoso To asa tosoch Taka aplea dolleamnim polletoleanv ani Tachê sarkim zatoleanv mhunn Sion bhorvanso dovorta ani sotmandta (1 Ju. 3:2-3, 1 Kor 13:12). Emmanuel sogllea pordhanancho ani sogllea odhikariancho ani podviancho bhosm korun raj Devachê, Aplea Bapachê adhin kortolo mhunn Sion sotmandta(1 Kor 15:24). Sion ucharun sangta ki Emmanuel amkam aplea sangatak amchea khorea ghorant, Sorginchea Sionant (St 87:5, Filip 3:20, Ju 14:3) ami axeun vatt polletat tea Sorginchea xarant (Heb 11:10, Heb 13:14, Pro 22:19), Tannem amkam toiar kel'lea ghoramnim vhortolo(Ju 14:2).Hi prithum ani Devachea Utran jem sogllem rochun haddlam ani samballun dovorlam, tantutlean  Devachem Utor porot kaddun ghetlea uprant tacho purnntaien bhosm zatolo oxem Sion visvas korta(2 Ped 3:10).

Sion vhodda umedin mandta ki Parishudh Mai zaun asa Parishudh Zannvaiechi Mai (Zann 6:12, Zann 8:4, Zann 9:9), ani hea Zannvaie vorvim ami Utracho Khoro Orth somzun ghetat ani Utor uzvadd ghalta. Sion mandun gheta ki Parishudh Maria Deva Bapachea sogllea soddvonnechea vaurant Bapachi Rajdutt, ani Sionant vosti korun ani tankam eka monachim korun ti Sionak Dusrea Nirgamanank toiar kortoli (Bar3:37). Sionachi ghoxnna zaun asa oxi, Soglleanchi Mai, Parishudh Maie sorxim porot vocho porian, Adanvanchea bhurgeancher jem zodd zum dovorlolem asa tacho nas zauncho na (Sir. 40/1) ani Tika zo konn chittkun ravta to Jivi-diupi Sumurtin bhortolo ani omor zatolo (Bar. 4/1).

Jezu Krista-vixim ani Tannem Aplea poilea ienneant purnn kel'lea ani Aplea Dusrea ienneant purnn korcho asa tea soddvonnechea kama vixim Parishudh Pustokant boroilolea sogllea Deivik Guttancher Sion visvas korta . Devachea sogllea Utracher Sion sotmandta, jim Utram purnntaiek pavleant ani purnn zatat ani purnn zaunchim asat. Sion Devachea sogllea kamacher ani Devan zaka dhaddla tacher  visvas dovorta Deva Bapa koddlean sakxi zaun aschea Kallacheo soglleo Khunna Sion mandun gheta (Luk 24:44-46). Devachem Utor aikun Sion hinddachim kallzam lastat. Fokot zanchim kallzam sotmandun ghetat ani uktim zaleant, tim kallzam Anondan lastolim ani fokot Devachea Putan mon uktem korit zalear konui  Devachem Utor somzunk ani sotmandunk xokta (Luk 24:32, Luk 24:45). Devachea Utrant Xokti asa oxem Sion sotmandta (Mk 12:24).

Deva Bapan Edenache bhagent Aplea Bhurgeank dil'lem sogllem dhoniponn ani mhoima portun meltolem mhunn Sion mandun gheta (Jer 29:11-14). Jezu Krist, foll diunk naslolean anjirachea zhaddak xirap ghatlea uprant, Aple xis aplea bhavartha vorvim Tachea poros vhodd kornni kortole oxem zahir korta (Mt 21:18-22).  Sion sotmandta ki he mhoimechea (dharzonneachea) punnorsthapona vorvim Devachim Bhurgim sogllea foll diupi zhaddank sogllea vellar follam dium-xi koruk xoktat. Sion sotmandta ki tim vosti kortat tea dongrak, thoim thaun halunk hukum ditole ani taka doriant dovortole. Hem Jezu Kristan kel'lem bhakit mhunn Sion visvas dovorta. Devachea Utrachi xokti onubhovtolea Sion hinddak, hea kornnecher  sotmandunk avgodd nhoi. Sion sotmandta ki Enokak (Ut 5:24) ani Elijak (2 Raz 2:11) je porim mornnacho onubhov korinastana voir ubarun vhele, toxench Sion hindd moronn chakinastanam sorgar vetolo. Moizesachea mornna uprant tachi kudd vhorop zaun aslem Devachea Bhurgeanchea punnorjivitponnachi ek khunna (Jud 1:9). Tabor dongrar Jezu Krist jedna rupantor zal'lo tedna, eklo zaka moron nastana jivo sorgar vel'lo taka (Elija) ani eklo zaka punnorjivont favo zalem taka(Moizes) sonvsarant sokla haddle.

Sion mandun gheta ki Kallachea xevottak- Aiz - ugddapi korunk toiar kel’li soddvonn bhôgunk ak'khea Sion hinddak heach bhavartha vorvim Devachea Podven rakhun dovortolim (1 Pedru 1:5) Sion sotmandta ki hea bhavartachi porikxa zatoli ani hea porikxenk fuddo kortolea Zion hinddak Emmanuel zo Aple mhoimen svotak ugddapo korun ditolo,Tachi vakhann’nni  favo zatoli (1 Ped 1:7).

Dekhun Bori Khobor dita tea bhorvanxea thaun pois vochonastana, Sion bhavarthan thir ani  khatren ravta (Kol 1:23)

Sion donui Bhavartachi Ucharnni mandun gheta.

Sorginchea ani prithumechea Dhoniak, Parishudh Mhojea Bapak hanv sotman’tam. Tacho ekloch Put, Mon’xa Put zaun kudd gheun hea sonvsarant portun ail’lea Raiancho Rai ani Dhoniancho Dhoni, Soddvonnar, Emmanuelak hanv sotman’tam. Sogllem xikoun, teo ugddas kortolea adariak Parishudh Atmeak, hanv sotman’tam. Ovinaxi, bhov vhodd mogachi, bhoktechi, zannvaiechi Parishudh bhorvonxachi amchi Avoi Parishudh zannvaiek hanv sotman’tam. Fuddem ghoddtoleo sorv vostu kolloun, amkam sotachea purnntaiek pavoitolea, Sotachea Atmeak hanv sotman’tam. Parishudh Zannvaiechea Atmeak hanv sotman’tam. Sotachea utrak, khorea Provadianchea ienneak, Uzvaddache Parishudh Sobhek hanv sotman’tam. Tachea Putachea punnor-iennea vellar amkam melltolea oprimit mog, oprimit xokti ani oprimit kurpek hanv sotman’tam. Xevottachea kallacher, kuddichea rupantoracher ani nit vostolea novea mollbacher ani novea prithumecher hanv sotman’tam. Bapan toiar kel’lea Sasnnik xaracher, Nimanne zhôddtecher, Bapa sovem aslolea Sasnnik jivitacher hanv sotman’tam. Amen.